ब्रेकिंग

विदेश

दहशतवादी मसूद अझहरला १४ कोटी रुपयांची भरपाई?

Samruddhi Dhayagude
15 May 2025

दहशतवाद्यांना पाकिस्तानचा पाठिंबा कायम

इस्लामाबाद : पाकिस्तानच्या शाहबाज सरकार जागतिक स्तरावर दहशतवादी म्हणून घोषित असलेला आणि जैश-ए-मोहम्मदचा (जेईएम) प्रमुख मसूद अझहरला १४ कोटी रुपयांची भरपाई देऊ शकते. माध्यमांनी याबाबत वृत्त दिले आहे. ऑपरेशन सिंदूर या दहशतवादविरोधी मोहिमेदरम्यान भारतीय सशस्त्र दलांनी केलेल्या कारवाईत मसूदच्या कुटुंबातील १४ सदस्यांचा मृत्यू झाला. पाकिस्तानचे पंतप्रधान शाहबाज शरीफ यांनी प्रत्येक मृतांना एक कोटी रुपयांची भरपाई जाहीर केली आहे. अशा परिस्थितीत, दहशतवादी मसूद अझहरलाही या भरपाईचा लाभ मिळण्याची शक्यता आहे.

पाकिस्तान सरकारने मारल्या गेलेल्या दहशतवाद्यांचा उल्लेख सामान्य नागरिक म्हणून केला आहे. पाकिस्तानच्या माध्यमांनी दिलेल्या वृत्तानुसार, मसूद अझहरने एका निवेदनात पुष्टी केली, की मृतांमध्ये त्याची मोठी बहीण आणि तिचा पती, एक पुतण्या आणि त्याची पत्नी, एक भाची आणि त्याच्या कुटुंबातील पाच मुले समाविष्ट आहेत. या कुटुंबातील कदाचित अझहर हा एकमेव कायदेशीर वारस आहे.